Baixo o lema "Para consumir sen nos consumir", ADEGA  e os colectivos A Gentalha do Pichel, Amarante, Equisol, a Federación Ecoloxista Galega, Panxea e Verdegaia levamos o 22 de decembro á Praza do Toural un mercadiño alternativo e económico con ideas prácticas para un consumo máis consciente. Un obradoiro de xoguetes feitos con materiais de refugallo, unha xornada de troco, elaboración de cosméticos e perfumes naturais e información sobre a pegada ecolóxica e social que xeran os nosos hábitos de consumo, serán as actividades que propoñemos 7 organizacións de Compostela nunha campaña contra o consumismo e os excesos propios do Nadal.

ANIMÁDEVOS a celebrar  con nós un nadal mais ecoloxico, xusto e sostible!Estaremos na Praza do Toural o 22 de decembro a partir das 12.00 da maña!

Consumir menos, vivir mellor

Con esta campaña, queremos respostar á tradicional chamada ao consumo e ás necesidades artificiais xeradas pola publicidade dos medios de comunicación de masas. Do que se trata é de habilitar un espazo de intercambio non capitalista, sensibilizando no consumo consciente e denunciando ao mesmo tempo un modelo económico asentado sobre o consumismo e o esbanxamento innecesario de recursos naturais, tanto no Norte coma no Sur. Se só o 1% das cousas que mercamos fica nas nosas casas transcorridos seis meses, non ten xeito seguir alimentando esta maneira de consumir.
Por iso, neste mercadiño de Nadal non só se poderán facer compras, as máis pequenas e pequenos da casa aprenderán como dar unha segunda vida aos envases que van parar ao lixo e deseñarán os seus propios xoguetes; todas coñeceremos un pouco máis sobre o troco, un sistema de mercado onde o que se ten en conta é o valor das cousas e non o seu prezo en moeda, partindo da premisa de que as inxustizas que nacen do sistema capitalista só se combaten promovendo outro xeito de consumir que respecte as persoas e o medio ambiente. Os adultos poderán  agasallar cosméticos e perfumes naturais que respetan o noso medio e protexen os animais que son vítimas das multinacionais a hora de probar estes novos produtos. Estes obradoiros son os que realizará ADEGA ademais de ter diferentes mostras de cosméticos e explicar outras recetas alternativas os regalos convencionais do nadal.

Mais quen se achegue até o Toural tamén coñecerá o labor de movementos alternativos coma as cooperativas vinculadas co comercio xusto ou a agricultura ecolóxica. A posta en valor do traballo das produtoras, a defensa do comercio local, a loita polo dereito á soberanía alimentar dos pobos e contra as relacións inxustas que fan as grandes multinacionais son algúns dos piares que sosteñen o comercio solidario. Así, nos postos de Equisol, Amarante e Panxea saberemos de onde vén o café do noso almorzo e canto custa producilo, que son os 'alimentos quilométricos' e a súa pegada ecolóxica, en que condicións traballan as persoas que cosen a nosa roupa nos países do Sur ou o papel das mulleres nas cooperativas que venden os seus excedentes no mercado xusto.